يومياتي أنا والقبطان

الساعة ٦ ونص صباحا

 قمت أخد جرعة الكورتيزون بتاعتي، ملقيتش ميه. دخلت المطبخ وأنا بين نوم وصحيان 

( مع حالات نقص في جرعات قهوة متلاحقة )

 لقيت بابا بيعمل شاي 

غمغمت صباح الخير 

بص لي وقالي : إيه يا بنتي اللي عاملاه في شعرك داه؟

غمغمت في سري أصبحنا و أصبح الملك لله ..

مستناش ردي وقال : 

روحي بصي على نفسك في المرايا وسرحي شعرك داه ..

 قلتله : أنا داخلة المطبخ أجيب ميه يا بابا مش رايحة أتصور لتسريحة سنة 2012 ..

 دخلت أوضتي ومش عارفه ايه خلاني أبص في المرايا : لقيت شعري طالع لفوق .

أي والله مش نازل لتحت وجيت امسكه طلع شراره وكهربني . 

كويس بابا مكنش جنبي كان طفاني بالميه والكارثه بتحصل في ثانية . 

خلاص مبدهاش بقى حخلي حد يركبلي “سلك أرضي”