شبشبي الطائر : يعيش يعيش يعيش

هذا المقال ( غير المنشور من قبل ) كتبته منذ عدة أعوام باللهجة العامية .

المقال ده أنا كتبته من بنين أفكاري .. معلش أصل أنا معنديش بنات .. النهارده الصبح و أنا باحاول أنام .. أصلي كنت متضايقه قوي علشاني وعلشان غيري .. الأيام اللي فاتت كل الأخبار اللي بنشوفها أو نسمعها أو نقراها بتقول بصوت عالي.. مافيش فايدة.. و حتى لما أتكلم مع الصديقات و الأخوة في المدونات ألاقي أحزان وغضب و ضيق و خلافات لا و أكيد الواحد علشان بيحب كل اللي حواليه بيزعل لزعلهم. بس أنا على أد ما أنا عصبية إلا إني تقدروا تقولوا مع المصائب والويلات هادئة والكل بيبقى مفروس مني.. يعني ولله الحمد أنا كده تقدروا تقولوا من كتر ما جريت بالبنين بتوعي للمستشفى علشان غرزة هنا أو زايده هنا أو فتق هناك .. دلوقتي لما بقيت بادخل المستشفى بالاقيهم بيفتحولي الباب بابتسامة ناس عشرة ومرة إحدى الممرضات قالتلي: يا مدام المفروض انتي تعملي كارنية للمستشفى يعملولك تخفيض.. وبالتالي لازم أنا أكون جبل جليدي في الأزمات.. وبالفعل ولله الحمد مهما أمر في أزمات بارفع راسي لربنا و اقول: اجعلها مكفرات ذنوب يارب وفي ميزان حسناتي.. الخير منك يارب والشر من أنفسنا .. إحنا بنتكلم عن إيه أساسا ؟ ] المقال الخفيف ده هدية لأي واحد زعلان و متضايق و قرفان ووووووو….
زي ما إنتم عارفين الغضب بيعمل إيه في الناس؟

زي ما إنتم عارفين العضب بيعمل إيه في الناس : و أنا من الناس اللي لما أحس بمخي مليان بهموم بادي مخي أجازة. طيب أصلي يعني مينفعش أزعل و أغضب وأتنرفز و أنا معايا في البيت عصابة مفترية طول اليوم بيصرخوا ويتخانقوا ويضربوا بعض فلازم اكون كووول طبعا حتسألوني إزاي كوول ؟ حاقولكم الصبيان طبعا بيجروا بسرعة البرق، و أنا بصفتي أم ولازم تكون لي هيبة مش معقول حاقوم أجري وراهم و أساسا أساسا لو جريت مش حاحصلهم و حاقول أي أي الديسك والنتيجة حتكون مش حلوة حتى المرة اليتيمة اللي تدخلت فيها بين اتنين بيلعبوا مصارعة حرة كانت النتيجة إن صباعي اتخبط خبطة في التربيزة وقعدت شهر كامل لابسه صباع حديد في إيدي و أنا أساسا من الناس اللي بتقشعر من الحديد مع الحديد يعني مجرد وأنا باكتب كلامي ده قشعرت وسناني خبطت في بعضها، المهم بقى نرجع للموضوع الأساسي.. اللي يسألني بتتعاملي مع العصابة المفترية دي ازاي أقولكم كلمتين وبس شبشب طائر ومش أي شبشب ، لا شبشب قماش ناعم ولا شبشب بلاستيك لا علشان لازم البس شبشب له كعب متين علشان أنا ركبي حديد ولو لبست الشباشب السخيفة الرقيقة دي ركبي توجعني والوجع يطلع عالعمود المايل وتبقى قصة طويلة … يعني من الآخر شبشبي الطائر تقيل الولد من دول يجري مني قبل ما يكمل تلات خطوات أكون رافعه الشبشب وطراخ يلبس بقى مكان ما يلبس ودائمًا يصيب

الهدف وبإجادة….
ابني الكبير طبعا في الجامعة و بصراحه هو مهذب ومحترم وميجيبش التهزيء لنفسه من صغره فدايما الاتنين اللي في النص اللي غاويين عذابي هم اللي بيصيبهم الهدف.. وبما إننا عائلة بتاعة رماية الأبناء ووالدهم وقبلهم أبويا فابني بيقولي أنتي بطلة رماية يا أمي ولو عملوا أولمبياد شباشب طائرة حتاخدي الميدالية الذهبية ..طيب حطوا نفسكم مكاني يا ناس.. أنا الجيران لما يصادف أركب معاهم الأسانسير بيبصولي بشفقة وبابتسامة والاقي جارتي تقولي الله يعينك باسمع صوتك معاهم طول النهار والليل .. أخ بتسمع صوتي ؟ يبقى الشبشب أحسن والا إيه ؟؟ عموما هو شبشب مش حذاء زي اللي بوش أخده ومش خسارة في طيبة قلبه أبدًا.

أقول لكم كلمة سر ؟ أعرف واحدة صاحبتي مرة حدفت بنتها بدكتور شول و البت يا نضري الشبشب لبس في عينها وهي عارفة نفسها وأكيد حتدخل دلوقتي تموتني فيه حد لسه زعلان؟ تعالوا زروني في بيتي تجدوا ما يسركم.