مريضة محترفة طب

السنين اللي فاتت -وبعد تعاملي مع الأطباء في بلادنا العربية – بدأت أقرأ كتير في المواقع الطبية وأذاكر وأتناقش مع الدكاترة لدرجة بيسألوني : أنتي دكتورة ؟ أقولهم لا مريضة بدرجة الاحتراف .

وطبعا نظرًا لأن أمة الله مش جهبذ أوي في الإنجليزية فكنت بدخل على المواقع الطبية العربية، وليتني ما فعلتها لأن المواقع دي- أغلبها_ بتنقل نقل مسطرة أو كوبي وبيست زي ما بيقولوا في لغة التكنولوجيا وياريتهم مثلا بينقلوا من مواقع محترمة وثقة إلا إنهم بينقلوا من مواقع ركيكة وخيبة، وداه خلاني بصراحه أنسى المواقع دي كلها وابتدي أذاكر طب بالانجليزي …

نضرب مثلين؟

1 .تدخل على موقع عربي تسأله عن مشاكل قصور الغدة النخامية تلاقيه أول ما ينطق يقولك إن 70% تقريبا من حالات قصور الغدة بيموتوا موت الفجأة من غير مقدمات كده، في حين بقى إنك تدخل على موقع أجنبي محترم تلاقيه يبتدي يسألك أسئلة مهمه أوي و يفهمك مشاكل الغدة دي و يبتدي يقولك لو رايح لطبيب غدد لازم قبل ما تروح تجاوب عالأسئلة دي علشان دي حتساعدك تعرف مرضك وبعدين يبتدي يقولك العلاج والجرعات و لازم تاخد بالك من كيت وكيت ووووووووووووووووو وفهم المرض بيخليك دكتور نفسك … فاضل يقولك والدنيا بمبي وطال عمرك .

2 . تدخل على موقع عربي تسأله عن التهاب العصب المعرفش كام يقعد يتكلم وبعدين يقول إيه؟ إن أغلب اللي بيصيبهم المرض داه بينتحروا..

وإن من المعروف إن الفنان جورج كلوني مصاب بهذا الداء … ياه بجد أنا كده سعيدة…جورج كلوني بنفسه؟  هو كده أنا المفروض اتبسط يعني وأقول : لا طالما جورج كلوني أنا مش زعلانه؟ بالعكس بقى جورج كلوني أحبط نص نساء العالم لما راح اتجوز أمل هانم كلوني يعني مفروض تختاروا ممثل تاني كده ريتشارد جير والا حاجة.

السؤال هو أحنا لإمتى حنفضل كده؟  لإمتى حنفضل غلط بناخد كل حاجه من بره وياريتنا بناخد الحاجة الصح ؟

عايز تكتب في الصحة والأمراض : انتقي يا سيدي المواقع الأجنبية المحترمة وانقل عنها..

عايز تتناقش بصراحة وموضوعية مع مريضك – وداه شيء مش غلط- اختار الفاظك وطريقة عرضك للموضوع واتكلم صح ..

احترمونا علشان نحترمكم  واقتبسوا الصح مش الخيبة ..

خليكم شاطرين زي عمي جوجل كدة اللي بقى بيفهمها وهي طايره .