دعاء جماعي

ياريت كلنا نصلي و ندعي دعاء جماعي عشان كل واحد ماسك التليفون لو فصل منه شحن و جيه يشحنه و النور قطع ،حيقعد ساعة أو أكتر بدون ما يمسك التليفون، بدل ما تجيله نقطة أو سكر أو يطب ساكت من الصدمة .

ربنا يكفينا شر قطع النت و يرزق اللي الماسكين في الموبايل باقة نت و يبارك في سرعته …. قولوا آمين 

يارب يجازي اللي يشتت تركيزك عن المواضيع و الأفكار المهمة اللي بتطلع من التليفون و يحرق بجاز  أي حد يندهك ، و يقوي نظرك و يقدرك على التبريق و البحلقة في شاشة التليفون ٢٤ ساعة قادر يا كريم و يكفينا شر هادمي اللذات و يعمي مراتك / أو جوزك عنك يارب …. قولوا آمين

يارب يكرمك و يعمي عنك أي حد فاهم أو متعلم بجد مش قاري كام بوست على النت و عامل فيها مثقف و مجمع معلومات من جوجل .

يارب يزود عدد ليكاتك و يقويك على التمحيص و التفحص في صور و معلومات كل واحد و واحدة كاتبة كومنت أو معلقين عندك و تفضل تجمع في معلومات عن كل البني آدمين علشان لما تتسأل عنهم في أخرتك تعرف تجاوب قادر يا كريم… 

يارب يقويلك فقرات رقبتك و عضلات إيدك و يرزقك، بعد ما رقبتك تتعب من ماسكة التليفون، بدكتور علاج طبيعي بيجي البيت عشان الواي فاي في البيت .

يارب ما يحدف في سكتك حد من بتوع الطاقة أو حد لايف كوتش أو الأكاديمين الفاهمين المحبطين اللي بيتكلموا عن الاستخدام المعتدل لأي حاجة و إيجابيات استخدام النت و الأمور الهادفة اللي عشانها عملوا الإنترنت و اللي استخدامته مؤخرَا راحت حتة تانية خالص و يخليك كدا في حتتك البعيدة عن الاعتدال و الإيجابيات .

يارب قلل في تجمعتنا… لا فرح و لا حزن يستحق تجمعنا …اللهم بارك في إيموشن الحزن 😔و إيموشن العياط و و إيموشن السعادة 🤣ويخلينا إيموشنتنا حلوها أو مرها و نعيد و نفرح و نعيط على الماسنجر ووالتساب …  قولوا آمين 

 مشاعرنا بقيت مزيفة و ضحكنا غير مبرر و صورنا الكتيرة و انبسطنا اللي كدا و كدا و هنفضل نكدب على نفسنا و هنفضل نقصف جبهة اللي حوالين عشان صورنا تطلع حلوة.