قواعد التطفيش الأربعون: كيف تطفشين عريسًا
بقلم الكاتبة/ نهى عاصم
بنوته حلوة :
الحقيني يا خالتو ،بنت القبطان ، بابا عايزني أقعد بكره في كافيه مع عريس معرفة زميله في الشغل وأنا مش موافقه عليه …
عملت نفسي من بنها وسألتها : ليه ؟ هل سمعتي عنه ما يعيبه؟ ديناً أو خلقاً ؟
قالتلي : لا والله بالعكس مكانش بابا جابهولي أصلاً بس أنت عارفه أنا معجبة بأخو زميلتي في الجامعة وهو تخرج وخلص جيش ولسه يادوب باديء شغل و مفترض أنه حيتقدم لي عالعيد …
هنا بقى ونظراً لأني شايله في قلبي من الجنس الذكري من المواليد للشيوخ – وقتها يعني – قلتلها بصوت شرير : جميل … أحنا بقى اتهرينا الشهور اللي فاتت قواعد أربعين وأنا بقى حديكي بهريز القواعد دي وتنفذيها بحذافيرها …
أولاً : هو اسمه إيه؟
هي : عصام
أنا : حلووووو انتوا يادوب تقعدوا وتقومي بصاله وقايله رداً على كلامه : فعلاً يا أستاذ حسام وتقومي مبرقه ومخضوضه وحاطه إيدك على بقك كأنك أفشيتي سر حبيب اسمه حسام …
هي : قشطه كده واحد …
ثانياً : حيسألك تحبي تاخدي إيه؟
قوليله قهوة سادة محوجة وجاتوه شوكولا
حيطلب قهوة محرج منك وغالباً حيكون زيه زي أغلب رجالنا حيطلبها بسكر و مش محوجة علشان بيقرف من الحبهان وذكرياته مزعجه عنه في الشوربه …
تقومي بصه له وتقوليله : مش فاهمه أنا ازاي الناس تشرب قهوة بسكر … القهوة لازم تتشرب مُره … أنا وبابا وماما وأخواتي بنشربها سادة …
هي : ترسل ضحكات شريره ( نياهاهاها ) كده ٢
ثالثاً : تقوليله هو حضرتك أهلاوي والا زملكاوي ؟ قال زملكاوي تقوليله : أوه احنا كلنا اهلاويه متعصبين وبجد بجد مش قادره افهم ايه نادي الزمالك داه ؟ داه حتى تاريخه يكسف أي حد … داه أنا ودادي ومامي واخواتي بنحب جدا نجيب ولاد خالي في ماتشات يكون فيها نادي الزمالك بيلعب ونشجع النادي التاني والله بقى لو بنلاعبهك احنا بيبقى يوم اللي ما يشتري يتفرج ….
هي : الله عليكي يا أم البنين انتي متأكده ان ولادك حيسامحوكي لو سمعوا الكلام داه؟
رابعًا : تعملي حسابك يكون معاكي فلوس علشان احتمال كبير جداً يقولك حدخل الحمام ومش حتشوفي وشه تاني … وترجعي بقى لباباكي تقوليله بحنان : إيه داه يا دادي؟ داه مافيهوش ولا أي حاجة منك ؟ أنا عايزه أتجوز واحد يكون شبهك ولو في حاجة حلوة من ال ٧٨٩٠ ألف حاجة اللي فيك …
ساعتها حيطلب صاحبه ويقوله : مافيش نصيب …
هي : كده بح العريس …
خامسُا : حستنى دعوة الخطوبة ليلة العيد أو أنا بنفسي اللي حدور على حسام اللي اسمه أصلا عصام و أجوزهولك وأخليه ينتقم منك باقي عمرك …
سادسًا : القصة دي من بنات أفكاري محصلش منها ولا أي كلمة
بس الفضى وحش بعيد عنكم .